और किसे का खोट नहीं यो सारा जमाना ऐ तो खोटा सै !
तन्नै रांझे और मिल ज्यांगे तो मन्नै के हीरां का टोटा सै !!
जै आछी ढाल निभावेगी तो तेरी गैल खड्या पाउंगा
सुख दुःख के मंह हरदम तेरी आगे अडया पाउंगा
जै तू आडी आडी चालैगी तो मेरे के फहरी सै
अपनी कसर काढ लिए जो तेरे बाकी मन में रहरी सै
ना बस की बात तेरे यो दिल ऐ तेरा छोटा सै !!
कर कान उरे नै आ तन्नै याद करा द्यूं
पाछले बखत नै ल्याके आगे आज धरा द्यूं
तेरे बोले होए बोल तन्ने हटके याद करा द्यूं
के बीत रही सै मेरे पै तन्नै खोल के आज बता द्यूं
तन्नै बता द्यूं कोंसी आग मैं आज तू मेरे टी झोक्या सै !!
कदे ना कदे कोए तन्नै भी तेरे जिसा थ्या ज्यागा
ओराँ नै दुःख देवन आली तन्नै कित तै सुख पा ज्यागा
इतने दुःख दे ज्यागा कोए दिन पछले याद करा ज्यागा
मेरे जान का गम तन्नै भीतर ऐ भीतर खा ज्यागा
तू के जाने सर मेरे पै गम का कौन भरोटा सै !!
जै कदे आज्या याद तो '' डाया '' के मांह आ जाइये
किसे गरीब की गरीबी का ना फायदा और उठाइए
जिसकी गैल चाल पड़ी तू बढ़िया ढाल निभाइए
सच्ची खोल बता दिए ना सुपने और दिखाइए
इतना सा बस जबर''' नामदेव '' का ,ना इसते ज्यादा पोटा सै !!
सोमबीर ''''नाम देव ''''
कोई टिप्पणी नहीं:
एक टिप्पणी भेजें